2018 jyldyń 26 jeltoqsanynda «Qazaqstan Respýblıkasynda zeınetaqymen qamsyzdandyrý týraly» QR Zańyna tıisti ózgerister engizildi. Ol azamattyq-quqyqtyq sıpattaǵy (AQS) sharttar boıynsha jumystar oryndaıtyn jáne qyzmetter kórsetetin jeke tulǵalar úshin mindetti zeınetaqy jarnalaryn (MZJ) tóleý rásimin ońaılatýǵa baǵyttalǵan.
Eske sala ketelik, azamattardyń bul sanaty 2018 jyldyń shilde aıynan bastap MZJ tóleýge mindettelgen bolatyn.
Al jańadan engizilgen ózgerister 2019 jyldyń qańtar aıynan bastap kúshine enedi.
Eger azamattyq-quqyqtyq sıpattaǵy sharttardyń bir taraby salyq agenti, ıaǵnı zańdy tulǵalar, jeke kásipkerler, jeke notarıýstar, jeke sot oryndaýshylary, advokattar, kásibı medıatorlar bolatyn bolsa, olar jeke tulǵalar úshin, olardyń ishinde frılanserlerge beriletin tabystan MZJ tóleıtin agentke aınalady. Bul rette mindetti zeınetaqy jarnalary alatyn tabystyń 10 paıyzy mólsherinde, biraq respýblıkalyq bıýdjet týraly zańmen tıisti qarjy jylyna belgilengen eń tómengi jalaqynyń 10 paıyzynan kem emes jáne 50 eselengen mólsheriniń 10 paıyzynan joǵary emes mólsherde belgilenedi.
Al eger azamattyq-quqyqtyq sıpattaǵy sharttar salyq agenti bolyp tabylmaıtyn jeke tulǵalarmen jasalatyn bolsa, onda frılanserler MZJ tóleýge quqyly bolady. Iаǵnı, mindetti emes. Bul jaǵdaıda jeke tulǵa mindetti zeınetaqy jarnalaryn óziniń uıǵarýymen Qordaǵy jeke zeınetaqy shotyna aýdara alady. Bul úshin ol jarnalardy ekinshi deńgeıdegi bankter nemese Qazposhta arqyly «Azamattarǵa arnalǵan úkimet» Memlekettik korporasııasyna tóleıdi. Ári qaraı Memlekettik korporasııa jarnalardy Qorǵa aýdarady. Atap ótý kerek, eger frılanser óziniń osy quqyǵyn paıdalanatyn bolsa, bul onyń jeke zeınetaqy kapıtalyn qalyptastyrýyna oń áser etetin bolady.
Budan basqa, eńbek sharty boıynsha jaldamaly jumysker retinde eńbek etetin ári jeke tulǵalarmen jasalǵan azamattyq-quqyqtyq sharttar boıynsha jumystar oryndaıtyn nemese qyzmet kórsetetin azamattar azamattyq-quqyqtyq sharttar boıynsha alynatyn tabystan MZJ tóleýden bosatylady.
Bul rette MZJ esepteý úshin alynatyn eń joǵary jıyntyq jyldyq tabys respýblıkalyq bıýdjet týraly zańmen tıisti qarjy jylyna belgilengen eń tómengi jalaqynyń 50 eselengen mólsheriniń 12 eselengen somasynan aspaýy tıis. Iаǵnı, 2019 jyly jıyntyq jyldyq tabys 25 500 000 teńgeden asatyn bolsa, bul somadan artyq alynatyn tabys MZJ tóleýden bosatylady.